Intego y'iyi sosiyete ni ukurushaho guhangana na Anthropic, cyane cyane ku bakiliya b'ibigo by'ubucuruzi, no gushaka inyungu mbere yo gushyira imigabane yayo ku isoko ry’imari.

Ibi kandi bivuze guhindura imikoreshereze ya ChatGPT, aho abasanzwe bayikoresha ku buntu, hari aho bizaba ngombwa ngo bishyure ifatabuguzi kuri serivisi zimwe na zimwe nka Codex ikoreshwa mu kwandika code.

Thibault Sottiaux, uyobora ishami ry'ibicuruzwa muri OpenAI, yavuze ko bari gukora porogaramu izaguha umufasha wawe bwite w'ikoranabuhanga ushobora kugufasha muri byose, haba ku giti cyawe cyangwa mu kazi.

Guhera mu mwaka ushize hagiye havugwa amakuru ku ntego za OpenAI kuri iyi porogaramu y'ikirenga. Muri Werurwe, The Wall Street Journal yatangaje ko iyi gahunda ari impinduka ikomeye mu ngamba z'iyi sosiyete nyuma yo gushyira hanze serivisi zitandukanye mu 2025.

Abayobozi ba OpenAI bavuga ko baretse imishinga inyuranye nk’uwa porogaramu y'amashusho ya Sora, kugira ngo gusa imbaraga zose zerekezwe kuri iyi porogaramu.