Uyu mukino wabaye ku wa Kane, tariki ya 2 Gicurasi 2026 unitabirwa n’abandi banyacyubahiro batandukanye.

Al Ahly yatangiye umukino neza itsinda amanota menshi ibifashijwemo na Donovan Williams.

Mu mpera z’agace ka mbere, Lukeny Gonçalves yagabanyije ikinyuranyo, agace ka mbere karangira Al Ahly iyoboye umukino n’amanota 24 kuri 23 ya Petro de Luanda.

Mu gace ka kabiri, umukino wegeranye cyane amakipe yombi agendana mu manota cyane, Childe Dundao na Lual Acuil batsinda ku mpande zombi.

Igice cya mbere cyarangiye Al Ahly yatsinze Petro de Luanda amanota 48-43.

Charles Edward Moore na Raphael Putney bakomeje gufasha amakipe yombi gutsinda amanota menshi, cyane ko umukino wari wegeranye cyane.

Muri aka gace, amakipe yombi yatsinze amanota 22-22, karangira Al Ahly ikomeje kuyobora umukino n’amanota 70 kuri 65 ya Petro de Luanda.

Agace ka nyuma kari indyankurye, Petro de Luanda yagaragaje ak’inda ya bukuru Gonçalves na Dundao batsinda amanota menshi, yigaranzura Al Ahly.

Umukino warangiye Petro de Luanda yatsinze Al Ahly Benghazi amanota 94-88 igera ku mukino wa nyuma wa BAL 2026.

Umukino wa nyuma uteganyijwe ku Cyumweru tariki ya 31 Gicurasi. Petro de Luanda izahura na RSSB Tigers yo mu Rwanda.

Ni mu gihe, umukino wo guhatanira umwanya wa gatatu uzahuza Al Ahly na Al Ahly yo mu Misiri.

Byitezwe ko umukino wa nyuma uzaba ari indyankurye kuko uzahuza Tigers yigaragaje cyane ndetse na Petro de Luanda ikipe ya mbere ifite ubunararibonye kurusha andi.

Iyi kipe yo muri Angola kandi isanzwe ifite iki gikombe yegukanye mu 2024. Ni mu gihe mu 2021 yabaye iya gatatu, 2022, iba iya kabiri, mu 2023 yabaye iya kane, mu gihe umwaka ushize yatsindiwe ku mukino wa nyuma na Al Ahly Tripoli.