Papa Léon XIV yatangiye uruzinduko muri Afurika ku wa 13 Mata. Yabanje muri Algeria, ahava ku wa 14 Mata 2026.

Muri Cameroun biteganyijwe ko Papa azibanda ku ngingo zirimo amahoro, kubana neza, iterambere ry’urubyiruko n’interambere rya muntu mu nguni zose z’ubuzima, ni ukuvuga mu bukungu, imibereho myiza, mu bya roho no ku mubiri.

Antoine Kambanda yagizwe Cardinal ku wa 28 Ugushyingo 2020, na Papa Francis.

Kuva icyo gihe Vatican yamugize umwe mu bagize Dikasiteri [ni nka Minisiteri] ishinzwe Iyogezabutumwa n’ishinzwe Umuco n’Uburezi muri Kiliziya Gatolika ku Isi.

Aba-cardinal baherekeza Papa mu ngendo ajyamo akenshi ni abafite inshingano zihura n’ingingo zizibandwaho muri izo ngendo.

Biteganyijwe ko muri Angola Papa azaba yibanda ku rubyiruko, iterambere rya muntu n’ingaruka za ruswa n’ubukoloni.

Muri Guinée équatoriale ho Papa azibanda ku ngingo zerekeye uburezi n’umuco n’uruhare rwa Kiliziya mu kubaka amahoro.

Umubare munini w’aba-Cardinal bo muri Afurika bari mu bagize itsinda riherekeje Papa Léon XIV muri uru ruzinduko.

Kiliziya yatangiye gushyiraho aba-Cardinal benshi muri Afurika no kubaha inshingano zo ku rwego mpuzamahanga nka bumwe mu buryo bwo kongerera imbaraga ubukirisitu bwo kuri uyu mugabane utuwe n’abayoboke ba Kiliziya barenga 20%.