Mugisha watumiwe n’Ikipe ya TPHCM Vinama, ari muri Vietnam guhera mu ntangiriro z’uku kwezi, aho yitabiriye iri siganwa rigizwe n’uduce 25, kuva tariki ya 3 Mata 2026.

Agace ka 16 kakinwe ku wa 20 Mata, kahagurukiye i Nha Trang kerekeza i Da Lat ku ntera y’ibilometero 140, kasize uyu mukinnyi w’Umunyarwanda yegukanye umwanya wa kabiri akoresheje amasaha atatu, iminota 58 n’amasegonda 51, asigwa isegonda rimwe na Sergei Kulikov wabaye uwa mbere.

Yarash Uladzislau w’Ikipe ya Ho Chi Minh City New Group yakomeje kwambara umwambaro w’umuhondo amaze gukoresha 43, iminota 20 n’amasegonda 37 mu gihe Mugisha Moïse yazamutse akagera ku mwanya wa gatanu asigwa iminota icyenda n’amasegonda 51, imyinshi muri yo akaba yarayisizwe ubwo yatobokeshaga igare mu gace ka 11.

Mugisha Moïse yizeye gusozanya umwambaro w’umukinnyi urusha abandi kuzamuka imisozi, aho kuri ubu ayoboye urutonde n’amanota 51, arusha Pierantozzi Lucio umukurikiye amanota 13.

Agace ka 17 k’iri siganwa riri ku rwego rwa 2,2, gakinwa kuri uyu wa 21 Mata, ni ako kuzenguruka intera y’ibilometero 51 iruhande rw’Ikiyaga cya Xuan Huong mu Ntara ya Lam Dong.

Ubwo iri siganwa ryatangiraga tariki ya 3 Mata, ryarimo abakinnyi 115, ariko kugeza ku gace ka 16 hari hasigayemo abakinnyi 27 gusa.