Iri siganwa ry’umunsi umwe ribera mu Butaliyani, ryakinwaga ku nshuro yaryo ya 117.

Kuri uyu wa Gatandatu, abakinnyi basiganwe intera y’ibilometero 298 aho bahagurutse i Milan berekeza i Sanremo.

Pogačar wegukanye Shampiyona y’Isi inshuro ebyiri ziheruka na Tour de France inshuro enye, yasize abandi ubwo hari hasigaye ibilometero 22, akurikirwa na Pidcock na Mathieu van der Poel gusa.

Van der Poel watwaye iri siganwa ry’umunsi umwe rizwi nka “Monument” inshuro ebyiri, yasigaye batangiye akazamuko ka nyuma ka Poggio, imbere hasigara Pogačar na Pidcock.

Pogačar yabanje kwiyaka Pidcock ashaka kumusiga, n’undi abigenza uko, ariko bombi bagerana ku murongo, uyu Munya-Slovenia atanga Umwongereza gukozaho ipine.

Kuri ubu Pogačar ufatwa nk’umukinnyi ukomeye wabayeho mu mateka y’umukino w’amagare, amaze kwegukana amasiganwa ya “monuments” ane muri atanu, aho irisigaye ari irya Paris-Roubaix.

Mu mukino w’amagare, amasiganwa amaze igihe, akomeye ndetse y’umunsi umwe azwi nka “Monument” ni Milan-San Remo, Tour of Flanders, Paris-Roubaix, Liège-Bastogne-Liège na Il Lombardia.

Gutsinda kuri uyu wa Gatandatu byatumye Pogačar anganya intsinzi 11 n’Umubiligi Roger de Vlaeminck ku mwanya wa kabiri w’abatsinze “monuments” nyinshi. Undi Mubiligi Eddy Merckx ni we uri imbere aho yatsinze 19.

Pogačar na we ari gutera ikirenge mu cya Merckx watsindaga amasiganwa y’ibyumweru bitatu [Grand Tours] n’ay’umunsi umwe.

Merckx yatwaye Grand Tours 11, Monuments 19 na Shampiyona y’Isi inshuro eshatu.

Ku myaka 27, Pogačar amaze gutwara Grand Tours eshanu, Monuments 11 na Shampiyona y’Isi inshuro ebyiri.

Isiganwa ry’abagore rya “Milano-Sanremo 2026” ryegukanywe n’Umubiligikazi Lotte Kopecky mu gihe Umutaliyanikazi Debora Silvestri yajyanywe mu bitaro nyuma yo gukora impanuka ikomeye.

Abakinnyi 10 ba mbere mu isiganwa ry’abagabo:

-# Tadej Pogačar (Slo/UAE Team Emirates-XRG): 6hrs 35mins 49secs
-# Tom Pidcock (GB/Pinarello-Q36.5)
-# Wout Van Aert (Bel/Visma-Lease a Bike): +4secs
-# Mads Pedersen (Den/Lidl-Trek)
-# Corbin Strong (NZ/NSN)
-# Andrea Vendrame (Ita/Jayco-AlUla)
-# Jasper Stuyven (Bel/Soudal-QuickStep)
-# Mathieu van der Poel (Ned/Alpecin-Premier Tech)
-# Matteo Trentin (Ita/Tudor)
-# Edoardo Zambanini (Ita/Bahrain Victorious)