Itangazo Gisagara VC yashyize hanze mu ijoro ryo ku wa Gatandatu, tariki ya 20 Kamena 2026, rigaragaza ko aba bakinnyi bombi bahagaritswe kubera imyitwarire mibi.

Muvara Ronald na Cerick Ngaboyintwari bahagaritswe igihe kingana n’iminsi 90, kubera kubangamira ikipe mu gihe cy’irushanwa rya Volleyball ryo kwibuka ku nshuro ya 32 Jenoside yakorewe Abatutsi mu 1994.

Ikipe yagize iti “Gisagara VC irabamenyesha ko yafatiye ibihano byihuse byo guhagarika mu gihe cy’iminsi 90 abakinnyi bayo Muvara Ronald na Ngaboyintwari Cedrick.”

“Ibi bigendanye n’imyitwarire itihanganirwa bagaragaje mu irushanwa rya GMT 2026, byagize ingaruka mu ikipe. Gisagara ntabwo izihanganira na rimwe imyitwarire mibi ndetse izakomeza kwimakaza ikinyabupfura n’ubunyamwuga.”

Ku munsi iyi kipe yo mu Karere ka Gisagara yagombaga gukiniraho umukino wa ¼ wari kuyihuza na Police VC, yageze ku kibuga itinze bituma isezererwa muri iri rushanwa kubera mpaga.

Muri Gisagara VC iherutse kwemeza Kwizera Marchal nk’Umutoza Mukuru, biravugwa ko harimo umwuka mubi by’umwihariko mu mibanire y’abayobozi n’abakinnyi.

Zimwe mu mpamvu ni ugutinda kw’imishahara y’abakinnyi, aho bamwe bari banze gukina kuko batarabona amafaranga yabo y’ukwezi gushize.

Kuri iki Cyumweru, mu irushanwa ryo Kwibuka 2026, hateganyijwe imikino ya nyuma, aho mu bagabo REG VC ihanganira na Police VC umwanya wa gatatu, hanyuma APR VC na Kepler VC na zo zigahanganira umwanya wa mbere.

Ni mu gihe mu bagore Police WVC ikina na Kepler WVC zishakamo ikipe ya gatatu, hanyuma APR WVC ikine na KPC WVC zishakamo ikipe ya mbere.