Uyu mukinnyi uzuzuza imyaka 39 ku wa Gatatu, yatsinze igitego 17 n’icya 18 mu Gikombe cy’Isi, arusha ibitego bibiri Umudage Miroslav Klose watsinze ibitego 16 hagati ya 2002 na 2014.

Messi yageze ku gahigo ke ku munota wa 38, ubwo yafunguraga amazamu mu mukino wo mu Itsinda J wabereye muri Dallas, nyuma y’uko Thiago Almada yari amaze gusimbuka umupira wari uvuye kuri Facundo Mediana mu rubuga rw’amahina.

Uyu rutahizamu wa Argentine yatsinze igitego cya kabiri mu minota y’inyongera y’umukino, anyujije umupira kuri ba myugariro ba Autriche ubwo umunyezamu Alexander Schlager yari amaze kubuza Julián Alvarez gutsinda.

Messi yakabaye yashyizeho agahigo hakiri kare, ariko yateye hanze penaliti yo ku munota wa munani ubwo Lautaro Martínez yari amaze gukinirwa nabi na Stefan Posch mu rubuga rw’amahina aho we na mugenzi we Xaver Schlager bamuhuriyeho.

Kuri ubu Messi ni we umaze gutsinda ibitego byinshi mu irushanwa ry’uyu mwaka aho afite ibitego bitanu mu mikino ibiri, nyuma y’uko yatsinze bitatu ku mukino wa mbere bahuyemo na Algeria.

Argentine yagize amanota atandatu, yiyongereye kuri Mexique, Leta Zunze Ubumwe za Amerika n’u Budage mu makipe yamaze kubona itike ya 1/16. Ni mu gihe izasoreza kuri Jordania ku Cyumweru, tariki ya 28 Kamena 2026.

Abakinnyi batsinze ibitego byinshi mu mateka y’Igikombe cy’Isi:

-* 18 Lionel Messi (Argentine, 2006-2026)
-* 16 Miroslav Klose (u Budage, 2002-2014)
-* 15 Ronaldo (Bresil, 1994-2006)
-* 14 Gerd Müller (U Budage bw’Uburengerazuba, 1970-1974)
-* 14 Kylian Mbappé (u Bufaransa, 2018-2026- mbere yo gukina na Iraq)
-* 13 Just Fontaine (u Bufaransa, 1958)
-* 12 Pelé (Brésil, 1958-1970)
-* 11 Sandor Kocsis (Hongrie, 1954)
-* 11 Jurgen Klinsmann (u Budage bw’Uburengerazuba n’u Budage, 1990-1998)
-* 10 Helmut Rahn (u Budage bw’Uburengerazuba, 1954-1958)
-* 10 Gary Lineker (u Bwongereza, 1986-1990)
-* 10 Gabriel Batistuta (Argentine, 1994-2002)
-* 10 Harry Kane (u Bwongereza, 2018-2026)
-* 10 Teofilo Cubillas (Peru, 1970-1982)
-* 10 Thomas Müller (u Budage, 2010-2022)
-* 10 Grzegorz Lato (Pologne, 1974-1982)