Mu ijoro rishyira kuri uyu wa Mbere, tariki ya 22 Kamena 2026, ni bwo kuri Hard Rock Stadium muri Leta Zunze Ubumwe za Amerika hakiniwe umukino wo mu Itsinda H wahuje Uruguay na Cape Verde yaherukaga kwandika amateka ihagama Espagne bikanganya igitego 1-1.

Ku munota wa 21 w’umukino, Kevin Lenini ukinira Cap-Vert yafunguye amazamu kuri coup-franc yateye yijyana mu izamu. Ni cyo gitego cya mbere iyi kipe yari ibonye mu Gikombe cy’Isi, biba amateka kuko cyabonetse kuri coup-franc, ibyari bitarabaho na rimwe kuva mu 1966.

Iyi kipe iri mu zihagarariye Afurika yatsinze ibitego bibiri muri uyu mukino harimo n’icyinjijwe na Helio Varela. Uruguay na yo yatsindiwe ibitego bibiri na Maximiliano Araujo na Maximiliano Araujo, amakipe yombi anganya ibitego 2-2.

Umunyezamu Vozinha wari ukurikiwe n’umubyeyi we uherutse kwakirwa muri Leta Zunze Ubumwe za Amerika, yari ategerejweho kongera gukuramo imipira myinshi, ariko nta mupira ukomeye n’umwe yakuyemo muri uyu mukino.

Kugeza ubu Cap-Vert ni iya gatatu mu Itsinda H, ikaba inganya amanota abiri na Uruguay. Iya mbere ni Espagne yanyagiye Arabie Saoudite ibitego 4-0.

Kugeza ubu amakipe yose ari gukina Igikombe cy’Isi ku nshuro ya mbere, yamaze kubona igitego. Ayo ni Curaçao, Jordanie, Uzbekistan na Cap-Vert.

Undi mukino wandikiwemo amateka ni uwa Misiri na Nouvelle-Zélande ziri mu Itsinda G zahuriye kuri BC Place muri Canada. Iyi kipe yo muri Afurika yabonye amanota atatu yayo ya mbere mu irushanwa.

Misiri yabonye intsinzi ya mbere mu Gikombe cy’Isi yatangiye gukina mu 1934, nyuma yo gutsinda Nouvelle-Zélande ibitego 3-1, ndetse yahise iyobora Itsinda G n’amanota ane.

Ibitego byayo byatsinzwe na Mostafa Zico ku munota wa 58, Mohamed Salah ku wa 67, hamwe na Trezeguet ku munota wa 82. Ni mu gihe Finn Surman yari yafunguye amazamu ku munota wa 15.

Kuva Igikombe cy’Isi cya 2026 cyatangira, Mohamed Salaha ni we mukinnyi waremye uburyo bw’igitego inshuro 10 mu mukino umwe.

Iran yahagamye u Bubiligi bikanganya 0-0, zombi zinganya amanota abiri, mu gihe Nouvelle-Zélande ifite inota rimwe.