Iradukunda ni umusore ufite ibihangano byomora imitima ya benshi bakunda indirimbo zifite icyanga zo kuramya no guhimbaza Imana.

Fiston Iradukunda ni umusore ufite ubuhanga mu muziki wo kuramya no guhimbaza Imana. Abarizwa mu Majyepfo y’Afurika, aho asengera kuri I.P.I.M Casa Blanca.

Yize ubuhinzi n’ubworozi kandi amaze gusohora indirimbo ebyiri zirimo iyo yise “Wambereye Inshuti” na “Ibanga” yasubiyemo mu buryo bushya.

Avuga ko kwinjira mu muziki wo kuramya Imana ari umuhamagaro we kuva kera akiri muto atangira kuririmba ari mu mashuri yisumbuye, mu gihe nyuma yagiye ahimba indirimbo ze bwite kugeza atangiye kuzishyira hanze.

Mu kiganiro yagiranye na IGIHE yavuze ko mu 2026 yiteguye gukora cyane kurusha uko bisanzwe.

Ati “Umwaka ugiye kuza ntegereje gukora indirimbo nyinshi nshya. Iziri muri studio n’izindi nyinshi nshobora gukora. Ni byinshi nateganyirije abakunda Imana n’abakunda gusenga; mbona uzaba umwaka mwiza w’amateka.”

Kuri ubu yashyize hanze indirimbo nshya y'amashusho yise "Ambwira Ko", ikaba ije isanga “Ibanga” imaze amezi icyenda iri hanze.

"Ibanga" ifite amateka akomeye ku muryango we, kuko yanditswe kera ataravuka. Ayisobanura nk’indirimbo y’umwihariko yakundwaga cyane na Se witabye Imana.

Iradukunda Fiston afite intego yo kugeza ubutumwa bwiza kure hashoboka, ndetse akavuga ko Israel Mbonyi ari umwe mu bo afatiraho icyitegererezo. Iyo yirebye mu ndorerwamo y’ahazaza, yizera ko mu myaka itanu iri imbere azaba ageze ku rwego rwo hejuru mu muziki.

Reba zimwe mu ndirimbo z’uyu muhanzi