{Urusengero rwa Jubilee Revival Assembly rwateguye igiterane ngarukamwaka cy’ububyutse n’imbaraga z’amasengesho.}

Iki giterane ngarukamwaka cy’ububyutse n’imbaraga z’amasengesho bita “Revival Catalyst Conference 2014” kizatangira tariki ya 14 Nyakanga 2014 kikazamara iminsi 7 aho buri munsi kizajya kiba kuva saa kumi n’igice z’umugoroba kugeza saa moya n’igice.

Nkuko bitangazwa na Pastor Stanley Kabanda, iki giterane cy’uyu mwaka wa 2014 kikaba gifite insanganyamatsiko igira iti “The Power of Prayer and Evangelism” ugenekereje mu kinyarwanda bikaba bisobanuye ngo Imbaraga z’isengesho n’ivugabutumwa.

Bamwe mu bakozi b’Imana bazigisha ijambo ry’Imana muri iki giterane barimo Pastor Zigirinshuti Michele, Pastor Fifi Cameroun, Rev Pastor Richard Pillay wo muri Afurika y’Epfo na Pastor Kabanda Stanly na Pastor Julienne Kabanda ari nabo bazaba ari abasangwa.

Nk’uko twabitangarijwe na bamwe mu bari gutegura iki giterane kigiye kuba ku nshuro ya kane, bafata gusenga nk’inkingi y’ingenzi bakaba bagereranya amasengesho n’amavuta y’imodoka cyangwa se indege ngo nk’uko iyo bitabonetse bitagenda ngo ni nako n’itorero ritatera imbere hatabayeho gusenga.

Revival Catalyst Conference 2014 ni inyito y’igiterane ngarukamwaka cy’ububyutse imaze kumenyerwa n’abakirisito, iki giterane gitegurwa n’Itorero Jubilee Revival Assembly riyobowe na Pastor Stanley Kabanda afatanije na n’umugore we Pastor Julienne Kabanda, iryo Torero rikaba rikorera i Remera hafi na Hoteli Alpha Palace.