Byagaragajwe mu nama yabaye ku wa 29 Mata 2026, iteguwe n’Ishyirahamwe rihuza Ibigo by’Imari iciriritse mu Rwanda (AMIR), yigaga ku cyakorwa ngo hongerwe uruhare rw’abagore mu kugera kuri serivisi z’imari, yahuje abikorera, abayobozi mu nzego zitandukanye, n’abandi.

Muri iyi nama hagaragajwe imbogamizi abagore bagihura na zo zituma batinya kwaka inguzanyo, zirimo kwimwa ingwate n’abagabo babo, kubaka amafaranga bakimara gufata inguzanyo, kumva badashoboye, kutizerwa n’ibigo by’imari, n’ibindi.

Ibi byatumye bamwe mu bagore bashaka gutera imbere batangira kwiga amayeri yo gushaka uko bakwiteza imbere, binyuze mu kwizigamira nk’uko Nyirambwirande Anne Marie, ukorera mu Karere Musanze yabigaragaje.

Ati “Natangiye kujya nizigama ku ruhande kuri konti, akaba ari yo nzajya nkoresha mu gusaba inguzanyo ku bigo by’imari, kugeza nguze inzu ifite agaciro ka miliyoni 50 Frw.”

Nyirambwirande yagaragaje ko bamaze kugura iyo nzu ari bwo umugabo we yatuje, yemera ko ashoboye nubwo byari urugamba rutoroshye.

Abihurizaho na Uwitonze Jeannette ukorera mu Karere ka Huye ugaragaza ko iterambere ry’umugore rigora cyane ko hari n’amategeko abagabo babashyiriraho atuma batatera imbere, nk’amasaha yo gutaha ndetse n’ayo kugerera mu kazi.

Ati “Abakiliya baboneka mu gitondo kare na nimugoroba abantu bari gutaha ariko ugasanga umugabo arakubwiye ngo Saa Kumi n’Imwe ugomba kuba ufunze ukajya mu rugo guteka ati ‘sinzarya ibiryo byatetswe n’umukozi’. Ukareba ubwo buzima ukareba n’inguzanyo amafaranga igomba kunguka ukabona wazahomba uyifashe.”

Umuyobozi muri Banki Nkuru y’Igihugu, BNR, Dr. Moise Bigirimana, yagaragaje ko kutagera kuri serivisi z’imari kw’abagore ari ikibazo gihangayikishije, ari yo mpamvu igihugu kiba cyarasinye amasezarano yo gushyira mu bikorwa gahunda nka WE Finance Code(WE-FI).

WE-FI Code ni gahunda mpuzamahanga igamije kuziba icyuho kiri mu kubona serivisi z’imari kiri mu bagore.

Iyi gahunda ishyiraho imishinga itandukanye igamije gufasha abagore kugera kuri serivisi z’imari ndetse no kubaha amahugurwa ku bijyanye no gucunga imari.

Iyi gahunda mu Rwanda yatangiye mu 2025 aho ifite intego yo kuzamura abagore babona inguzanyo ku kigero cya 21% mu myaka itatu.

Hagiyeho imishinga itandukanye yo guha inguzanyo abagore n’urubyiruko, aho kuva yatangira hamaze gutangwa arenga miliyari 4,5 Frw.

Bigirimana agaragaza ko ibigo by’imari bifatanyije iyi ntego bayigeraho.

Ati “Ibyo tumaze kugeraho twagera kure harushijeho habayeho ubufatanye n’ubushake mu guteza imbere aba bagore kuko twahereye ku mubare muto uhwanye n’ubushobozi buhari ariko dufatanyije twagera kuri benshi.”

Umuyobozi Mukuru wa AMIR, Kwikiriza Jackson, yasobanuye ko mu mishinga habamo no gukorana n’ibigo by’imari kugira ngo bigabanye inyungu ku nguzanyo zihabwa abagore ndetse izindi ntizisabe ingwate.

Ati “Twakoze ubushakashatsi tumenya abagore bose bari mu bucuruzi, noneho dushyiraho imishinga n’intego z’imirimo izahangwa, aho nk’umwe uzahanga imirimo irenga ibihumbi 54 mu gihe undi uzafasha abarenga ibihumbi 18.500. Noneho by’umwihariko nibura 80% y’abo bagore bose akaba ari abari hagati y’imyaka 18 na 35.”