Ibi byabereye i Pont-à-Mousson, mu gace ka Meurthe-et-Moselle kari hagati ya Metz na Nancy. Uwo mugore yabonye urubuga rwavugaga ko rutanga inama ku ishoramari ribyara inyungu nyinshi.

Rwerekanaga ko iyo gahunda ishyigikiwe na Macron na Bernard Arnault, ibintu byatumye asa n’uwemera ko ari amahirwe nyayo yo kongera amafaranga ye.

Nyuma, umuntu wiyise umujyanama wa banki yaramuhamagaye amusaba gushyira porogaramu muri mudasobwa ye.

Abo batekamutwe bifashishije ikoranabuhanga ry’ubwenge bw’ubukorano, bakora amashusho n’amajwi asa n’aya Macron na Arnault, kugira ngo bagaragaze ko ishoramari ryabo ryizewe.

Uwo mugore yaje kohereza amafaranga inshuro ebyiri, buri nshuro atanga ibihumbi 5000 by’Amayero, yizezwa ko azunguka. Amafaranga yose yahise aburirwa irengero.

Abashinzwe umutekano bavuga ko ubu bwoko bw’ubutekamutwe burimo kwiyongera. Basaba abantu kwitonda, ntibakore ihererekanya ry’amafaranga babisabwe kuri telefoni, ntibatange amakuru ya banki cyangwa umubare w’ibanga, kandi ntibashyire porogaramu muri mudasobwa batizeye inkomoko yayo.