{Isosiyete icunga umutungo wa Nyakwigendera Bob Marley wamenyekanye nk'umuhanzi mu njyana ya Reggae, yakunze gushora imari mu bintu bitandukanye harimo ubucuruzi bw’inzoga, ikawa, n’ibindi, ariko kuri ubu ikaba yanongereyeho indangururamajwi (Speakers) zidasanzwe mu byo bifuza gukora no gucuraruza.}

Amakuru yatangajwe n’ikinyamakuru Mama Noire, iyi sosiyete yitwa House Of Marley, yamaze kwemeza igikorwa cyo kwagura ubucuruzi bwabo bakaba bagiye gukora no gucuruza indangururamajwi (Speakers).

Umwihariko w’izi ndangururamajwi, ni uko zitazajya zikenera gucomekwaho umugozi, ahubwo zifite ikoranabuhanga ryo gukurura amajwi agatambuka nta mugozi binyuzemo, ari nawo mwihariko utuma zirandukana n’izisanzwe zikoreshwa.

Izi ndangururamajwi ziswe “Get Together” bavuga ko bahisemo iri zina kuko bizera ko zizafasha mu guhuza abantu aho ubutumwa butangiwe ahantu hamwe buzajya bugera kure zikaba zanakoreshwa mu bitaramo bya muzika.

Kuva yava mu mubiri mu mwaka wa 1981, umuryango wa Nyakwigendera Bob Marley ntabwo wibanze mu kurinda gusa izina rye, ahubwo bitaye cyane no ku bindi bikorwa bimushamikiyeho.

Gusa, hari amakuru avuga ko haba hari imitungo ihwanye na miliyoni 600 z’amadorali yaba yinjizwa buri mwaka anyujijwe ku ruhande, ariu nabyo byatumye umuryango wa Bob Marley uvuga ko watangiye ibikorwa byo gukurikirana ababa babaca ruhinga inyuma.

Bivugwa ko hari amafaranga menshi umuryango wa Bob Marley ushobora kuba wabona ahwanye na miliyoni zigera ku 130 z’amadorali mu myaka 33 ishize apfuye. Ibi bivugwa mu gihe, umwaka ushize ku rutonde rwakozwe na Forbes Bob Marley yari ku mwanya wa Gatanu mu bahanzi binjiza amafaranga menshi mu bahanzi bapfuye.

Get Together sicyo gikoresho kirebana na muzika umuryango wa Bob Marley cyonyine ukoze kuko basanzwe banakora utwumvirizo (headphones), utwuma dukina umuziki n'ibindi.