Aba baturage bafashijwe guteza imbere ubuhinzi butangiza, kurengera ibidukikije binyuje mu gukoresha imbabura zirondereza ibicanwa n’ibindi.

Imibare igaragaza ko ingo ibihumbi 200 zahawe ibicanwa bitangiza ikirere n’ibindi byazamuye aka gace.

Umushinga wa Green Amayaga wakorewe mu turere tune tw’Intara y’Amajyepfo, tugize igice kizwi nk’Amayaga turimo Kamonyi, Ruhango, Nyanza na Gisagara. Watangiye mu mu 2019 kugeza mu 2025.

Ikigo cy’Igihugu gishinzwe Kurengera Ibidukikije (REMA), gitangaza ko uyu mushinga wageze ku baturage ibihumbi 415.780, aho 60.83% muri bo ari abagore. Wahaye abaturage imirimo 100.016 mu gihe wamaze ushyirwa mu bikorwa.

Uyu mushinga wafashije mu gutunganya hegitari 35.524, ibyatumye umusaruro uzamukaho 25% ugereranije na mbere.

Mu rwego rwo kurengera ibidukikije, uyu mushinga wafashije mu gusigasira amashyamba ya cyimeza angana na hegitari 467, ndetse ingo 233.227 zihabwa amashyiga arondereza ibicanwa.

Ibi byatumye ibidukikije bibungwabungwa kurushaho, hagabanywa imyuka ihumanya ikirere ingana na toni 625.989.

Uyu mushinga kandi wagize uruhare runini mu guteza imbere ibiti byaba iby’imbuto byitezweho gutanga umusaruro mu myaka 40 ndetse n’ibindi bivangwa n’imyaka, byatewe ku buso bwa hegitari zirenga ibihumbi 37.