Ku wa Gatanu tariki 27 Werurwe nibwo abahanzi berekeje i Nyamagabe ari naho bitegura igitaramo bakoreye kuri Stade ya Nyagisenyi.

I Nyamagabe hari ingufu zikomeye n'ishyaka ryinshi mu bafana mu kwerekana ko buri wese ashyigikiye ufite ingufu kurusha abandi. By'umwihariko abafana ba Oda Paccy na Knowless ni bo bari bafite ibyapa byinshi bigaragaza ko bashyigikiwe.

Benshi bari bitwaje ibyapa byanditseho amagambo agaragaza ko Indangamirwa za Paccy ziteguye gutwara igikombe naho aba Knowless bo bakaba bashimangiraga ko ku nshuro ya Gatatu aje muri iri rushanwa iki ari cyo gihe cye.

Mu bandi bahanzi wabonaga boroheje ibintu mu buryo bwose bushoboka.

UKO IGITARAMO CYAGENZE

– Dj Bissosso abifashijwemo na MC Anita Pendo na Tino batangiye gushyushya abafana babasunikira umuziki.

-Abahanzi bamaze kugera kuri Stade ya Nyagisenyi.

– Akanama nkemurampaka kari maso ngo kamenye uko umuhanzi yitwaye ari na byo bimuhesha amanota.

– Bull Dogg ni we ubimburiye abandi bahanzi. Atangiye agira ati 'Twe turi Tuff Gang nyayo.' Ahita yanzika n'indirimbo 'Nk'umusaza' yishimiwe bikomeye i Nyamagabe. Iyo yise 'Sinema' irishimiwe bikomeye ndetse abafana ubwabo bari kumufasha kuririmba ibitero byayo.

– Knowless Butera akurikiyeho mu ndirimbo 'Sweet Mutima', imwe mu zimufashije gutangirana imbaraga imbere y'abafana kuko bari kumufasha kuyiririmba bigaragaza ko indirimbo ze zizwi.

– Rafiki mu ndirimbo Gikomando ahise akurikira Knowless. Akurikijeho izindi mu ndirimbo ze zakunzwe mu myaka yo ha mbere. Rafiki yageze i Nyamagabe yitwaje ibendera ry'abarasita.

-TNP biyeretse abakunzi b'umuziki i Nyamagabe mu ndirimbo zabo nka 'Kamucerenge', 'Byina', 'Ku bwinshi' n'izindi.

– Oda Paccy akurikiyeho mu ndirimbo ze yamenyekaniyeho 'Mbese nzapfa', Love ya weekend, Rendez-vous n'izindi. Mu magambo ye Paccy aragaruka cyane ku Bisumizi avuga ko abafana ba Riderman bakwiye kumuba inyuma.

– Bruce Melody umaze iminsi aburana na Super Level ahereye ku ndirimbo yise 'Ndakwanga' akurikizaho 'Ntundize', 'Ndumiwe' n'izindi.

– Dream Boyz Indatwa bahereye ku ndirimbo yabo 'Isano', bakurikizaho 'Uzahahe Uronke', Urare aharyana', 'Tujyane iwacu' n'izindi zakunzwe cyane.

– Jules Sentore asesekaye imbere y'abafana n'icyivugo kivuga ibigwi bye n'inkomoko y'ubuhanzi bwe bufite imizi mu muryango wa nyakwigendera Sentore Athanase.

– Itsinda Active ni ryo rikurikiyeho mu ndirimbo ziherekejwe n'imbyino zigezweho.

– Senderi usigaye wiyita Tuff Hit cyangwa Chris Brown w'i Kigali a.k.a Intare y'Umujyi ni we usoje igitaramo mu ndirimbo ze nka 'Nta cash', 'Jalousie' , 'Umuvuduko' n'izindi yamenyakaniyeho.

Amafoto: Nsanzabera JP