Uyu mukino wabereye ku bibuga bya Tennis byo muri IPRC Kigali watangiye ku wa Gatandatu, ariko uhagarara utarangiye kubera imvura nyinshi yaguye i Kigali bigatuma ikibuga cy'itaka cyangirika ku buryo kitari gukinirwamo.

Joel Schwaerzler yari yatsinze iseti ya mbere yari igoye ku manota 7-6(5), aho we na Napolitano bakubanye mu gihe cy’isaha n’iminota 19 kugeza habonetse uyitsinda.

Napolitano w’imyaka 30, wazamukiye mu majonjora, yari ayoboye iseti ya kabiri n’amanota 3-2 mbere y'uko imvura nyinshi yagwaga i Kigali igatuma umukino uhagarara.

Kuri iki Cyumweru, umukino wasubukuwe Saa Tanu, ukomereza aho wari ugeze ndetse ntibyafashe umwanya munini kuko hakinwe iminota 43 gusa.

Schwaerzler w'imyaka 20, yongeye kugaragaza ko ari umuhanga mu gukina 'tie-breaks', atsinda iseti ya kabiri ku manota 7-6(6) ndetse yegukana iri rushanwa ritanga amanota 75 n'ibihumbi 17$.

Uyu Munya-Autriche yageze ku mukino wa nyuma atsinze Umutaliyani Marco Cecchinato amaseti 2-0 (6-2, 7-6(8)) mu gihe Stefano Napolitano yatunguranye asezerera nimero ya kabiri mu bahabwaga amahirwe mu irushanwa, Umufaransa Arthur Géa akamutsinda amaseti 2-1 (7-6(3), 5-7, 6-3).

Schwaerzler na Napolitano bazongera kwisobanura vuba, aho bazahura mu ijonjora rya mbere rya "Rwanda Challenger II".

Mu bakina ari babiri, Icyumweru cya Mbere cyegukanywe n’Umunyamerika Jay Clarke ukinana n’Umuholandi Max Houkes batsinze Umuhinde Siddhant Banthia n’Umunya-Bulgaria Alexander Donski amaseti 2-1 (6-4, 6(6)-7, 12-10).

Icyumweru cya Kabiri cya "Rwanda Challenger 2026" kizakinwa tariki 9-15, abakinnyi bahatanira amanota 100.

ATP Challenger 75 Tour yabaye mu cyumweru cya mbere na ATP Challenger 100 Tour izaba mu cyumweru cya kabiri, ni amwe mu marushanwa atanu ategurwa n’Ishyirahamwe rya Tennis y’Ababigize umwuga (ATP) muri iki cyiciro (hagati ya 50-175), aho atanga amanota 75 na 100 uko akurikirana.

Ni ku nshuro ya kabiri yikurikiranya u Rwanda rwakira aya marushanwa yombi atanga amanota 75 na 100, aho bwa mbere byari mu 2025, mu gihe mu 2024 rwakiriye iri rushanwa ritanga amanota 50.

Amafoto: African Tennis Tour