Aba bakinnyi bombi bakinnye umukino wa nyuma ku Cyumweru, bongeye guhurira ku bibuga bya Tennis byo muri IPRC Kigali nyuma y’amasaha 48 gusa.

Kuva tariki ya 8 kugeza ku ya 15 Werurwe 2026, u Rwanda rwakiriye “ATP Challenger 100”, irushanwa ritanga amanota 100 ku babigize umwuga, nyuma y’icyumweru rwakiriye iritanga amanota 75.

Abakinnyi bakina aya marushanwa yombi usanga ari bamwe, ndetse baba bashobora kongera guhura muri tombola bitewe n’uko bahagaze.

Nyuma yo kuzamukira mu mikino yo gushaka itike yo kwinjira muri “Main Draw” y’icyumweru cya mbere bikarangira ageze ku mukino wa nyuma, Umutaliyani Stefano Napolitano yahuye na Joel Schwaerzler wamutsinze ku Cyumweru.

Nk’uko byagenze mu minsi ibiri ishize, abakinnyi bombi bongeye gukina umukino wasorezwaga muri ‘tie-breaks’, ariko kuri iyi nshuro uwamenyuye ni Napolitano w’imyaka 30 aho yatsinze Schwaerzler w’imyaka 20 amaseti 2-0 (7-6(13), 7-6(4)) muri uyu mukino w’ijonjora rya mbere.

Umurundi Guy Orly Iradukunda yasezerewe n’Umutaliyani Marco Cecchinato wamutsinze amaseti 2-0 (6-0, 6-2) naho Umunya-Côte d’Ivoire Eliakim Coulibaly asezererwa n’Umufaransa Corentin Denolly wamutsinze 6-4, 6-3.

Umuholandi Max Houkes yasezereye Umufaransa Luka Pavlovic amutsinze amaseti 2-1 (4-6, 6-2, 6-2), Umufaransa Cesar Bouchelaghem asezererwa na mwenewabo Arthur Géa wamutsinze amaseti 2-1 (6-2, 6(3)-7, 4-6) mu gihe Umufaransa Florent Bax yasezerewe n’Umunya-Autriche Maximilian Neuchrist.

Muri 1/8 kizakinwa ku wa Gatatu, Stefano Napolitano azahura na Maximilian Neuchrist naho nimero ya mbere mu bahabwa amahirwe mu irushanwa, Umunya-Argentine Marco Trungelliti watwaye Rwanda Challenger mu 2024 azahura n’Umunya-Repubulika ya Tchèque Jonas Forejtek guhera Saa 10:00.

ATP Challenger 75 Tour yabaye mu cyumweru cya mbere na ATP Challenger 100 Tour iri kuba mu cyumweru cya kabiri, ni amwe mu marushanwa atanu ategurwa n’Ishyirahamwe rya Tennis y’Ababigize umwuga (ATP) muri iki cyiciro (hagati ya 50-175), aho atanga amanota 75 na 100 uko akurikirana.

Ni ku nshuro ya kabiri yikurikiranya u Rwanda rwakira aya marushanwa yombi atanga amanota 75 na 100, aho bwa mbere byari mu 2025, mu gihe mu 2024 rwakiriye iri rushanwa ritanga amanota 50.

Amafoto: African Tennis Tour