Mu Ukwakira 2025 ni bwo IHS Holding Limited yari isanzwe ari yo nyir’iminara y’itumanaho 1.467 iri mu Rwanda yari imaze kugurisha 100% by’ibikorwa byayo bifite agaciro ka miliyoni 274,5$ mu yindi sosiyete yitwa Paradigm Tower Ventures.

Ibyo bikorwa byaguzwe na Paradigm Towers Ventures byahise bijya mu maboko y’indi sosiyete nshya yo mu Rwanda iyishamikiyeho yitwa Ishara Towers Rwanda ari yo igiye kujya icunga ibyo bikorwa.

Amasezerano yashyizweho umukono ku mogoroba wo ku wa 26 Werurwe 2026 hagati ya Banki ya Kigali na Paradigm Tower Ventures ni yo yemeje iyo nguzanyo ku ruhande rwa BK mu gihe izindi banki zo zasinye ku buryo bw’ikoranabuhanga.

Izindi banki ni BPR Bank Rwanda Plc, Banki y’Amajyambere y’u Rwanda (BRD), I&M Bank Rwanda, Ecobank na Access Bank Rwanda.

Uwo muhango wabereye i Kigali ku cyicaro cya Banki ya Kigali witabiriwe n’ubuyobozi bwa BK n’ubw’ayo mabanki yandi ndetse n’abahagarariye Paradigm Tower Ventures.

Impamvu nyamukuru izo banki zihurije hamwe ngo ziyatange iyo nguzanyo ni uko ari amafaranga menshi bitakorohera banki imwe kuyatanga yonyine.

Iyo minara y’itumanaho ni inkingi ya mwamba mu itumanaho rinyuranye harimo guhamagara kuri telefone, gukoresha internet ndetse no gusakaza amashusho ya televiziyo.

Ibyo bituma gahunda zirimo guhererekanya amafaranga kuri telefone zishoboka, itumanaho mu by’ubucuruzi, kugera ku mbuga za internet n’ibindi.

Nyuma yo gushyira umukono kuri ayo masezerano Umuyobozi Mukuru wa BK, Dr. Karusisi Diane yavuze ko icyo gikorwa kigaragaza uburyo urwego rw’imari mu Rwanda rumaze gutera intambwe igaragara ituma rubasha guha inguzanyo imishinga minini.

Ati “Aya masezerano agaragaza ko urwego rw’imari mu Rwanda rumaze kwiyubaka bigaragara ku buryo rubasha gufasha imishinga minini y’ishoramari. Ubu rufite ubushobozi bwo guteza imbere ibikorwaremezo byo gukwirakwiza internet no guhanga ibishya bigatuma na rwo rugira uruhare runini mu bijyanye n’ubukungu.”

Umuyobozi Mukuru wa Paradigm Tower Ventures, Gordon Porter yashimye cyane uburyo ibiganiro bagiranye n’ayo mabanki kuva mu mpera za 2024 byatanze umusaruro bakemererwa inguzanyo ituma bagura ibikorwaremezo by’amafaranga menshi.

Yemeje ati “Navuga ko ibi birenze kuduha inguzanyo ahubwo ni ikimenyetso cy’uko dushobora gufatanya na banki zo mu Rwanda tugakora ibikorwa binini tukaguka kurushaho. Turi kwinjira mu mikorere mishya mu by’ubucuruzi kandi mu Rwanda ni ahantu heza ho gukorera ubu turiteguye cyane.”

Paradigm Tower Ventures ni sosiyete mpuzamahanga yashinzwe n’abantu batatu mu 2019 bari basanzwe bakora mu by’ubucuruzi bw’iminara mu bindi bihugu biyemeza gushinga sosiyete ikorera by’umwihariko muri Afurika yo Munsi y’Ubutayu bwa Sahara.

Kugeza ubu bakorera mu Rwanda binyuze muri ya sosiyete ya Ishara Tower Ventures ariko no mu bindi bihugu bya Afurika birimo Nigeria, Ghana, Afurika y’Epfo na Uganda.