{Abasore n’inkumi bo mu Murenge wa Gisozi, Akarere ka Gasabo, batangije gahunda y’umuganda udasanzwe ngaruka kwezi, bazajya bakora ku wa Gatandatu ubanziriza umuganda rusange mu rwego rwo kubungabunga ibikorwaremezo by'umurenge wabo.}

Urubyiruko rusanga 200, rwahuriye mu muganda udasanzwe watangijwe muri uwo murenge. Uyu muganda ngarukakwezi, uzajya ukorwa ku wa Gatandatu ubanziriza umuganda rusange usanzwe. Uyu muganda ukaba warakozwe ku ikubitiro ku wa Gatandatu tariki ya 20 Nzeri, wakorewe ku biro by’Akagari ka Ruhango.

Bugabo Robert, Umuyobozi w’Urugaga rw’urubyiruko rushamikiye kuri FPR Inkotanyi ku rwego rw’Umurenge wa Gisozi, atangaza ko iyo gahunda y’umuganda udasanzwe ngarukakwezi yashimwe n’urubyiruko rwose ruturiye Umurenge wa Gisozi.

Agira ati “Urubyiruko twiyemeje gufatanya muri iyi gahunda, baba abatuye mu murenge wa Gisozi ndetse n’abiga mu mashuri yisumbuye na Kaminuza biri muri uyu murenge. Iyi gahunda y’umuganda w’urubyiruko mu murenge wa Gisozi tuyitezeho byinshi, kuba yarateguwe n’urugaga rw’urubyiruko rushamikiye kuri FPR Inkotanyi, igashyirwa mu bikorwa n’urubyiruko rwose ni iby’agaciro.”

Nk’uko Bugabo yabitangaje, uretse urubyiruko rusanzwe rutuye mu Murenge wa Gisozi, uyu muganda witabiriwe n’abanyeshuri biga muri FAWE Girls School ndeste n’abo muri Kaminuza yigenga ya Kigali (ULK). Uru rubyiruko rwasizije ahazagurirwa inyubako y’ibiro by’Akagari ka Ruhango.

Ndayizigiye Pelerin Emmanuel, umwe mu rubyiruko rwitabiriye uwo muganda, yasabye bagenzi be gushyira mu bikorwa imvugo ibakoreshwaho nk’urubyiruko, ivuga ngo “Urubyiruko, imbaraga zubaka kandi vuba.”

Agira ati “Nk’urubyiruko, tugomba kugaragaza ko twubaka kandi vuba; tugomba gukura amaboko mu mifuka tugakora. Ntawe dusiganya ni ibyacu kuko ibyiza byabyo ni twe bigarukaho. Ibi ni ibikorwa byo kwihesha agaciro kuri twebwe.”

Mukabyagaju Nikita, umunyeshuri muri FAWE Girls School yavuze ko bishimiye kuba baje kwifatanya n’urundi rubyiruko mu gikorwa cyo gutanga umusanzu wabo ku gihugu. Agira ati “Iki ni igikorwa cy’ingirakamaro mu kubaka igihugu cyacu. Turashimira ikigo cyacu kuba cyaraduhaye umwanya wo kugira ngo natwe tujye twifatanya n’abandi, dutanga imbaraga zacu mu bikorwa by’iterambere.”

Uru rubyiruko ruvuga ko iyo rumaze gukora igikorwa nk’icyo bumva ko ari ab’agaciro, bityo bakirinda kuvunishanya, ngo bamwe barebere abandi bakora kandi barahisemo gufatanya. Uyu muganda wihariye ngarukakwezi w’urubyiruko rwa Gisozi uzajya wibanda k’ukwita ku bikorwaremezo byo muri uwo murenge.

[email protected]