Aya masezerano yashyizweho umukono n’Umuyobozi Mukuru Wungirije w'Urwego rw'Igihugu rw'Iterambere RDB, Juliana Kangeli Muganza, na Chairman wa Rich Resource International Investments (RRII), akaba na Visi Perezida n’Umunyabanga w’Inama y’Ubutegetsi ya Chery Holding Group, Xu Hui.

Impande zombi zasimye amasezerano y’ubufatanye burambye buri mu murongo wo guteza imbere ishoramari rirambye no no gushaka ibisubizo bijyanye n’ubwikorezi butangiza ibidukikije.

Ku mugoroba wo ku wa 23 Mata 2026 ni bwo Perezida Paul Kagame yagiranye ibiganiro na Xu Hui, byibanze ku mahirwe y’ishoramari aboneka mu Rwanda by’umwihariko ku gushinga mu Rwanda uruganda ruteranya imodoka z’amashanyarazi.

Chery Holding Group ni ikigo gikomeye cy’ubucuruzi cyo mu Bushinwa gikora imodoka cyohereza ku masoko atandukanye ku Isi, kikagira n’ibindi bikorwa by’ikoranabuhanga.

Muri Werurwe 2026, iki gigo cyacuruje imodoka 240.678, bigaragaza ukwiyongera kwa 12,1% ugereranyije n’uko kwezi mu mwaka wari wabanje.

Gifite intego yo gucuruza imodoka miliyoni 3,2, zikaziyongeraho 14% ugereranyije n’izagurishijwe mu 2025.

Iki kigo gikora imodoka z’ubwoko bwinshi igamije kwigarurira isoko ryo mu bice bitandukanye by’Isi.

Nk’urugero harimo imodoka za EXEED, iza iCAR zikoresha amashanyarazi zikorwa zigenewe urubyiruko n’izindi.

Mu 2023, Chery yashoye imari muri EV Motors yo muri Espagne hagamijwe kubyutsa imodoka za EBRO z’amashanyarazi.

U Rwanda rukomeje kwimakaza ubwikorezi butangiza binyuze mu gukoresha ibinyabiziga bikoresha amashanyarazi.

Ku wa 14 Mata 2026 Leta y’u Rwanda yategetse ibigo byayo byose gukora ku buryo imodoka nshya bigura ziba zirimo 30% z’amashanyarazi, ahakenewe nke bagashyira imbere kugura iz’amashanyarazi hagamijwe kugabanya imyuka ihumanya u Rwanda rwohereza mu kirere.

Binajyanye kandi na gahunda y’igihugu yo guteza imbere ubwikorezi butangiza ikirere. U Rwanda rwihaye intego yo kugabanya imyuka ihumanya rwohereza mu kirere ku rugero rwa 38% kugeza mu 2030.

Imibare igaragaza ko 43% by’imodoka zinjira mu gihugu ari iza hybrid.

Kugeza mu 2024 imodoka z’amashanyarazi gusa zari 512, mu gihe hiyongereyeho izikoresha amashanyarazi na lisansi ziba 7172.