Amakuru mashya yatangajwe n’urubuga Android Headlines agaragaza ko Pixel 10 izajya hanze ifite ububiko bwa 128GB, izagurishwa guhera ku Madolari ya Amerika 799.

Uru rubuga rwatangaje ko Pixel 10 ya 256GB izagumana igiciro gisanzwe cya 899$.

Ku rundi ruhande, Pixel 10 Pro izatangira kuboneka ku giciro cya 999$, ifite ububiko bwa 256GB iboneke kuri 1.099$, iy’ububiko bwa 512GB iboneke kuri 1.219$ mu gihe Pixel 10 Pro izaba ifite ububiko bwa 1TB izajya iguriskwa 1.449$.

Uru rubuga rwatangaje ko Google yafashe icyemezo cyo kudasohora Pixel 10 Pro XL ifite ububiko bwa 128GB, ikaba ari yo mpamvu yatumye ibiciro ku zo muri iki cyiciro bizamukaho gato ugereranyije n’izindi.

Ibi bivuze Pixel 10 Pro XL y’ububiko bwa 256GB izaboneka kuri 1.199$, igiciro kimwe nk’icyo Pixel 9 Pro XL ya 256GB yagiye hanze igura.

Bivugwa ko mu cyiciro cya Pixel 10 Pro XL haziyongeraho izifite ububiko bwa 512GB na 1TB ku biciro bya 1.319$ na 1.549$.

Ku bijyanye na Pixel 10 Pro Fold, Android Headlines yatangaje ko ifite 256GB izatangira kuboneka ku 1.799$, ifite 512GB iboneke kuri 1.919$, mu gihe Pixel 10 Pro Fold ya 1TB izagura 2.149$.

Biteganyijwe ko ku wa 20 Kanama 2025, aribwo Google izamurika ku mugaragaro izi telefoni.

Mu mpinduka zitezwe harimo ko zizongererwa uburyo bwo kuzongerera umuriro bidasabye umugozi [wireless charging]. Hitezwe ko Pixel 10 Pro Fold zizubakanwa ubushobozi bwo kwirinda umukungugu [dust-proofing], mu gihe iza Pixel 10 zizongererwa camera ya gatatu.