Inyandiko ya Minisiteri y’Ubumwe bw’Abanyarwanda n’Inshingano Mboneragihugu kuri Jenoside yakorewe mu Ruhengeri, igaragaza ko gutoteza Abatutsi muri icyo gice byatangiye mbere, bikajyanaga no kubita amazina atesha agaciro, nko kubita abashyondori, abatunnyetsi n’andi mazina mabi.

Ayo mazina mabi bayitwaga na bagenzi babo baturanye cyane cyane iyo bashakaga kubiyenzaho cyangwa bagamije kubateza umutekano muke.

Iyo Umututsi yatambukaga, abaturage baryanaga inzara ntibatinye no kumwerurira ko azicwa.

Byakomeraga cyane iyo Umututsi yabaga avuye kubanjura abaturage bamwiyenzagaho bamubeshyera ko agendana amasasu mu cyansi, bakamutegeka kubogora amata.

Mu mashuri, abarezi batotezaga abana b’Abatutsi bababwira ko banuka, ngo kubera amavuta y’Inka bisize, nyamara ntayo bisize.

Ibikorwa bijyanye no gutoteza Abatutsi no kubatesha agaciro byari bigamije gutinyura abaturage b’Abahutu no kubereka ko Umututsi ari mubi bityo kumwica ko nta cyaha baba bakoze.

Guhera mu Kwakira 1990, gutotezwa no guteshwa agaciro byakozwe ku mugaragaro, aho noneho batangiye kubita inzoka, inyenzi n’andi mazina mabi.

Iyo Abatutsi bavaga kubanjura, abayobozi b’inzego z’ibanze n’iz’umutekano bafataga amata bakayashyiramo igiti ngo bumve ko nta masasu bagemuriye Inkotanyi.

Abatangabuhamya batandukanye bavuga ko Burugumesitiri wa Komini Mukingo, Kajelijeli Juvénal yari yarabwiye abaturage ko nibaramuka bahuye n’Abatusi bafite amata, bagomba kujya babasaka bakareba niba nta masasu ari mu cyansi. Ibyo byatumaga babogora amata yabo kuko babaga bayashyizemo umwanda.

Mu rwego rwo gukomeza gushakisha impamvu bashingiraho batoteza Abatutsi, iyo babasanganaga radiyo bumva amakuru, barabafataga bakabacunaguza bababeshyera ko basanze bavugana n’Inkotanyi.

Nta Mututsi wabashaga kujya mu isoko ngo abashe kugurisha itungo rye nk’inka cyangwa ihene, kuko abayobozi b’inzego z’ibanze nka Konseye bafataga amatungo yabo cyangwa imyaka bari bajyanye mu isoko bakabitwara, bakababeshyera ko bashaka amafaranga yo kohererereza Inkotanyi.

Ako karengane, ivangura n’amacakubiri byakorerwaga abaturage mu bice byinshi by’igihugu, ni bimwe mu byatumye RPF-INKOTANYI itangiza urugamba rwo kubohora Igihugu ku itariki ya 1 Ukwakira 1990.

Kwitwa ibyitso by’inyenzi nk’amayeri yakoreshwaga n’ubutegetsi bwariho yatangiye kuva kera hagamijwe kwibasira no gushaka intandaro yo kwica Abatutsi.

Abatutsi bari batuye mu yahoze ari Perefegitura ya Ruhengeri abenshi muri bo cyangwa bose nta na hamwe bahuriraga n’ibikorwa bya Politiki ku buryo bagombaga kwibasirwa n’Ubutegetsi bwariho.

Nyuma y’aho RPF-Inkotanyi itangije urugamba rwo kubohora Igihugu mu Kwakira 1990, Abatutsi bo mu makomini atandukanye mu yahoze ari Perefegitura ya Ruhengeri baratotejwe bikabije, abandi bicwa rugikubita.

Ubwicanyi mu buryo bweruye bwatangiye nyuma yaho ingabo za RPF-Inkotanyi zigabye igitero mu mujyi wa Ruhengeri ku itariki ya 23 Mutarama 1991.

Guhera ubwo, ubwicanyi buteguwe bwahise butangira, bukaba bwaribasiye cyane cyane Abatutsi b’Abagogwe bari batuye muri Komini Nkuli, Mukingo na Kinigi.

Umwe mu barokotse ubwo bwicanyi watanze ubuhamya, yasobanuye ko hagati ya tariki ya 25 na 29 Mutarama 1991 haje igitero kirimo abaturage basanzwe n’abasirikare bahita bica umubyeyi we n’abandi batandukanye.

Ku itariki ya 25 Mutarama 1991, Burugumesitiri Kajelijeli Juvénal yohereje n’ímodoka ye abapolisi ba Komini n’abarinzi ba pariki y’ibirunga gufata Abatutsi b’Abagogwe, babajyana ku biro bya Komini Mukingo.

Nyuma yo kugezwa kuri Komini, bahise babicisha imbunda, imipanga n’amacumu ndetse habaho no gusambanya abagore b’Abatutsi mu maso y’abana babo.

Inama yateguye ubwo bwicanyi yabaye nyuma y’aho gereza ya Ruhengeri ifunguwe n’ingabo za RPA.

Iyi nama ikaba yari yitabiriwe n’abayobozi batandukaye harimo Nzirorera Joseph wari Minisitiri w’ubucukuzi bw’amabuye y’agaciro, akaba yarakomokaga muri iyi Komini, Nzabagerageza Charles wabaye Perefe wa Perefegitura ya Ruhengeri kugera mu 1992, Côme Bizimungu wari Perefe wa Perefegitura ya Gisenyi na Casimir Bizimungu wari Minisitiri w’Ububanyi n’Amahanga.

Ubwicanyi bwarakomeje bigeze ku itariki ya 4 Gashyantare 1991, habaho kwica mu buryo bukomeye, kuko abasirikare bafatanyije n’abaturage basanzwe, habaho guhiga Abatutsi mu mashyamba no mu bihuru.

Kuri iyo tariki, Abatutsi bari batuye mu yahoze ari Komini Nkuli biciwe mu ngo zabo, abandi bicirwa aho bari bihishe, ndetse hari nabo bafataga bakajya kubicira ku buvumo bwa Nyaruhonga, abandi babaroha mu kiyaga cya Nyirakigugu.

Kwica Abatutsi byagendanaga no gufata ku ngufu abakobwa b’Abatutsikazi.

Muri Gashyantare 1991, usibye kwica Abatutsi, hari n’abiyahuye kubera kunanirwa kwakira ibyo babonaga, cyane cyane iyo umugabo yabonaga umugore we bamusambanya ku mugaragaro mu maso ye.

Raporo mpuzamahanga ijyanye n’uburenganzira bw’ikiremwa Muntu mu Rwanda yasohotse muri Werurwe 1993, igaragaza ko muri Komini Nkuli, ahitwa Nyaruhonga muri Segiteri ya Kareba, hari ibyobo basanzemo imibiri y’Abatutsi bishwe.

Ikomeza igaragaza ko Abatutsi bishwe mu duce twakorewemo igerageza rya Jenoside nka Nkuli, Bigogwe na Kinigi, bagera kuri 300 icyakora raporo zitandukanaye zavugaga ko Abatutsi bishwe ari benshi bigoye kumenya umubare wabo, zikagaragaza ko abishwe bari hagati ya 500 ni 1000.

Nyuma y’uko Abatutsi b’Abagogwe bishwe ku mugaragaro bikozwe n’ubutegetsi bwa Habyarimana ndetse na raporo mpuzamahanga z’uburenganzira bw’ikiremwamuntu zikabigaragaza, Leta yavugaga ko icyihutirwa atari ukumenya abantu bapfuye n’uko bapfuye ahubwo icya mbere ari ukugarura amahoro mu Banyarwanda.

Uretse ibyo ariko Minisitiri w’Ubumwe bw’Abanyarwanda n’Inshingano Mboneragihugu muri Gicurasi 2025 yavuze ko Bigogwe yabaye indiri y’itegurwa rya Jenoside yakorewe Abatutsi binyuze mu gisirikari cyatoje abazakora Jenoside, aho igisirikari cyigishije Abahutu kwica Abatutsi vuba bakoresheje akagozi bitaga ‘corderette’ bakabanigishije mu ijosi.

Umutwe w’abicanyi wahabwaga iyo myitozo witwaga 'Turi Hose’ ni hano watorezwaga. Jean Paul nturanyenabo ni umwe mu batozaga abo bajenosideri baje kubarimbura.

Yavuze ko Jenoside yakorewe Abatutsi yateguwe mu gihe cy'imyaka 4 (1990-1994). Ikigo cya Gisirikari cya Bigogwe cyatorejwemo Interahamwe zifatanya n'abasirikari kwica Abatutsi mu myaka ya 1990, 1991, 1992, 1993 na 1994.