Iri tsinda rigizwe n’abadepite barindwi bayobowe na Depite Anita Schafer zakiriwe ku mupaka wa Akanyaru kuri uyu wa gatandatu, zizasura ibikorwa birimo uburezi, ubuzima, imiyoborere, iterambere n’ibindi mu ntara zitandukanye.

Ku munsi wa mbere w’uruzinduko rwabo, basuye ibikorwa bitandukanye mu ntara y’Amajyepfo nka kaminuza y’u Rwanda ishami rya Huye, n’ishuri rya Tekiniki rya Nyanza (ETO GITARAMA) aho baganiriye n’abashinzwe uburezi ku mitangirwe y’amasomo.

Mu rwego rw’ubuzima, I Huye basuye ikigo gishinzwe gufasha abahungabanye banungurana ibitekerezo ku buzima bw’abafite ibibazo bifitanye isano na Jenoside yakorewe abatutsi.

Kuri gahunda ndende y’uruzinduko rw’aba badepite bazabonana n’abayobozi bakuru muri Guverinoma y’u Rwanda n’abayobora inzego z’ibanze, bungurane ibitekerezo ku miyoborere mu Rwanda.

Mu bikorwa bazasura, harimo umupaka uhuza u Rwanda na Repubulika iharanira Demokarasi ya Congo i Rubavu, Ikigo cy’igihugu gishinzwe gusezerera no gusubiza mu buzima busanzwe abahoze ku rugerero, gusura imishinga y’abadage i Rulindo n’ibindi.

Mu cyumweru gishize Guverinoma y’u Rwanda n’u Budage bashyize umukono ku masezerano y’inkunga y’amayero miliyoni 7 ,azibanda ku bikorwa byo gushyigikira imiyoborere myiza no kwegereza ubuyobozi abaturage mu nzego z’ibanze.

Ambassaderi w’u Budage mu Rwanda, Peter Fahrenholtz, yavuze ko ubu bufatanye bushimangira umubano w’igihe kirekire hagati y’ibihugu byombi, cyane ko bifitanye amateka.

Yagize ati “Aya masezerano ni ikimenyetso cy’umubano n’ubuhahirane bishingiye ku bucuti n’ubwizerane byakomeje kuranga ibihugu byombi.Ubudage bufite umuhate wo gushyigikira iterambere ry’inzego zibanze mu Rwanda.”

Uretse uruzinduko rw’aba badepite, Ambasaderi Fahrenholtz yavuze ko hari n’abandi bayobozi bakuru mu gihugu cy’u Budage bazasura u Rwanda mu bihe bitandukanye hagamijwe kureba aho iterambere rigeze.

Twizeyimana Fabrice

[email protected]