BPR Bank Rwanda PLC ni umwe mu baterankunga b’ibi bitaramo byatangiye ku wa 20 Kanama 2026 mu Karere ka Huye.

Umuyobozi wa BPR Bank PLC, Ishami rya Huye, Mukundiyukuri Etienne, yabwiye IGIHE ko kwifashisha ibitaramo nk’ibi bituma bageza ubutumwa ku bantu benshi icyarimwe, by’umwihariko urubyiruko.

Ati “Iyo abantu bahuriye hamwe biba byiza. Ubu ni banki yose kuva mu bushorishori yabegereye. Turi kumva ibibazo byabo neza, kandi twizera ko tuzagera kuri benshi hose mu gihugu.”

Mukundiyukuri yavuze ko bashyize imbere kwegera abaturage binyuze mu bikorwa bibahuza, atanga urugero rwa Tour du Rwanda yabasigiye abakiliya bashya basaga 1.000 bafunguje konti.

Yavuze ko muri ibi bitaramo by’umuziki bakangurira abaturage uburyo bushya bwo kwiha inguzanyo bifashishije telefone bwiswe ‘Igurize Fasta Fasta’. Umuntu yiguriza agera kuri miliyoni 1 Frw, mu gihe cy’umunota gusa, akazayishyura mu kwezi.

Ati ‘‘Bizaca imirongo kuri banki n’ikoreshwa ry’impapuro, biteze imbere gahunda yo kudafata amafaranga mu ntoki, ube wabona avansi ku mushahara w’ukwezi, cyangwa se inguzanyo yihuse kuri wowe wikorera, ubundi ukemure ikibazo wagize cyangwa urangure ibicuruzwa, ugure muzatu y’imodoka n’ibindi, utavunitse.”

Mukundiyukuri yongeyeho ko binashoboka ko iyo nguzanyo yazamuka ikagera kuri miliyoni ebyiri cyangwa eshatu, bitewe n’ubushobozi bwa nyiri konti, ashishikariza abantu kuyigana.

Nsengiyaremye Dismas wo mu Karere ka Huye, Umurenge wa Tumba ni umwe mu bafunguje konti muri iyi banki kuri uwo munsi.

Yavuze ko yagiyeyo akuruwe n’abahanzi akunda, ahita yakirwa n’ubutumwa bwa BPR Bank Rwanda PLC.

Ati “Nubwo ndi umwarimu, ariko si byo nkora gusa, naguye imitekerereze nkora ubworozi n’ubucuruzi. Nari nsanzwe nzi BPR Bank Rwanda PLC hanze; ariko numvise ibikorwa byabo nko gutanga inguzanyo yihuse numva sinacikwa, ni byo binkuruye. Mfunguje konti ku buntu, ubu niteguye ko bazamperekeza mu bikorwa byanjye.”

Umuyobozi wa East African Promoters, EAP, Mushyoma Joseph, yashimye BPR Bank Rwanda PLC yahisemo kwisunga EAP mu kwegera urubyiruko ibinyujije mu bitaramo by’umuziki.

Ati “Hari ibyo turi kuganiriza n’abahanzi ubwabo, tubereka uko umuhanzi na we yatera imbere yifashishije BPR Bank Rwanda PLC, kuko tuzi neza ko ari inzira igeza ku iterambere ryihuse.’’

Mushyoma yakomeje avuga ko na EAP ubwayo hari ubushobozi yungukiye mu mikoranire na BPR Bank Rwanda PLC, ibyatumye banagura ibyo bakora.

Ati ‘‘Urabona nko gutegura urubyiniro nk’uru runini, bisaba imbaraga kandi nibo tubikesha.’’

Yavuze ko hejuru ya 70% y’ibikoresho bari gukoresha ubu ari bishya, kandi harimo ukuboko kwa BPR Bank Rwanda PLC.

Ati “Ubu bufatanye na BPR Bank Rwanda PLC twabushimye cyane, kandi twifuza ko no myaka iri imbere twazakomezanya, cyane ko tuzi ko mu Rwanda urubyiruko ari rwo rwinshi. Aba bari kubwira ni bo bakiliya babo ba none n’ejo hazaza, barebye kure kuko birabazamurira imyumvire yo gutunga konti, kubitsa ndetse no kuguza, ni urugendo rwiza.’’

Ibitaramo bya MTN Iwacu Muzika Festival 2026 byahereye mu Mujyi wa Huye, bikazakomereza i Ngoma, Nyagatare, Karongi, Muhanga, Musanze n’i Rubavu.