Muri iyi nkuru, tugiye kugaruka mu bihe bye by’umwihariko turebere hamwe filime 10 uyu munyabigwi wari urengeje imyaka 86 y’amavuko yakinnyemo zikaba ubukombe.

Uru rutonde rukurikije igihe izi filime zagiye zisohokera gusa.

-The Way of the Dragon
Mu mwaka wa 1972, ni bwo Chuck Norris yamamaye bwa mbere ubwo yagaragaraga muri filime yitwa "The Way of the Dragon". Aha yakinnye yitwa Colt. Uyu mwanya yawukinnyemo nk'Umunyamerika w’indwanyi ikomeye cyane ku rwego rw'Isi, wahawe akazi kugira ngo arwane na Bruce Lee mu mirwano y'amateka ya sinema.

Uyu murwano wabereye mu nzu izwi cyane y'i Roma yitwa Colosseum. Uwo mukino ufatwa nk'inkingi ya mwamba mu rugendo rwa Chuck Norris, kuko wamufashije kumenyekana ku rwego mpuzamahanga nk'umuhanga mu mirwano n'umukinnyi wa filime ukomeye.

- Good Guys Wear Black
Mu mwaka wa 1978, Chuck Norris yakinnye muri filime yitwa "Good Guys Wear Black". Yayikinnyemo nka Major John T. Booker. Muri uyu mukino, agaragara nk'uwahoze ari umusirikare wo mu mutwe w’abakomando (commando), watangiye gukora iperereza rikomeye nyuma y'iyicwa ry'abahoze ari abasirikare yari ayoboye.

Mu gihe ashakisha uburyo bishwe, avumbura akagambane gakomeye k’abayobozi bakuru. Iperereza rye rirangirira mu mirwano ikomeye yamenetsemo amaraso menshi, aho agomba gufata icyemezo hagati yo kureka ubutabera bwa leta bugakora cyangwa kwihorera we ubwe bitanyuze mu nzira y’amategeko.

- The Octagon

Mu 1980, Chuck Norris yakinnye muri filime yitwa "The Octagon". Yayikinnyemo yitwa Scott James. Muri iyi filime, agaragara nk'umuhanga mu mirwano ya Karate wari warashyize amasezerano ye ku ruhande.

Nyuma aza guhatirwa kwinjira mu muhezo w'inkambi y'iterabwoba ikomeye cyane ikoresha abantu bo mu bwoko bw’Aba-Ninja. Iyi filime yarakunzwe cyane kuko yazanye isura nshya y'imirwano ihambaye n'ubuhanga bw'Aba- Ninja mu ruhando rwa filime y'intambara.

- Silent Rage

Mu mwaka wa 1982, Chuck Norris yakinnye yitwa Sheriff Dan Stevens muri filime yitwa "Silent Rage".

Muri uyu mukino, agaragara nk’umuyobozi wa polisi (Sheriff) w’umujyi muto, uhangana n’umwicanyi ukomeye cyane wahinduriwe uturemangingo ku buryo bwa gihanga, bituma aba umuntu udashobora gupfa cyangwa gukomereka mu buryo bworoshye.

Iyi filime irimo imirwano isanzwe ivanze n'ibintu by'ubushakashatsi bwa siyansi. Yakunzwe cyane kubera uburyo uyu mupolisi yakoresheje imbaraga n'ubwenge kugira ngo ahagarike uwo mwanzi uteye ubwoba.

- Lone Wolf McQuade

Mu wa 1983, Chuck Norris yakinnye nka J.J. McQuade muri filime yitwa "Lone Wolf McQuade". Muri iyi filime, agaragara nk'umupolisi wa ‘Texas Ranger’ ukora akazi ke mu buryo bw’ukuri kandi bukaze akaba atajya acika ntege mu guhangana n'abagizi ba nabi.

Uyu mwanya yakinnye ni wo wabaye imbarutso n'isoko y'ibitekerezo byatumye nyuma hakinwa filime y'uruhererekane yitwa "Walker, Texas Ranger" yaje kwamamara cyane ku televiziyo.

- Missing in Action

Muri 1984, Chuck Norris yakinnye nka Colonel James Braddock mu yitwa "Missing in Action". Iyi Norris yayikinnyemo ari umusirikare wahoze mu ntambara ya Vietnam.

Muri uyu mukino, asubira mu mashyamba yo muri Aziya mu gikorwa gikomeye cyo gutabara abasirikare b'Abanyamerika bari barafatiwe mu kigo cy'imbohe z'intambara. Iyi filime yarakunzwe cyane bituma ivamo n'izindi zikomeza uwo mugambi w'ubutabazi.

- Code of Silence

Muri 1985, Chuck Norris yagaragaye muri filime yitwa "Code of Silence". Yayikinnyemo yitwa Eddie Cusack ari umupolisi ushinzwe iperereza mu mujyi wa Chicago.

Muri uyu mukino, uyu mupolisi azitirwa n’intambara ikomeye y’amabandi mu gihe na we ubwe ahura n’imbogamizi z’uko bagenzi be bakorana mu gipolisi banga kumubwiza ukuri cyangwa kumufasha ku bibazo biba biri imbere.

Iyi filime yagiye inahesha ibihembo Chuck Norris cyane nk’imwe mu zerekana ubuhanga budasanzwe bwe mu gukina inkuru z’iperereza zivanze n’imirwano ikaze.

- Invasion U.S.A

Mu wa 1985, Chuck Norris yakinnye muri "Invasion U.S.A." yitwa za Matt Hunter. Muri uyu mukino, agaragara nk'uwahoze ari umukozi w'ubutasi bwa Amerika (CIA) wari waragiye mu zabukuru, ariko akaza kugaruka mu kazi kugira ngo arinde Leta Zunze Ubumwe za Amerika.

Azirinda igitero gikomeye cy'iterabwoba cyari cyazigabweho kiyobowe n'umukozi w'ubutasi bw'Abasoviyeti, Abarusiya b’ubu. Iyi filime izwiho kuba yarerekanye ubutwari n'imbaraga zidasanzwe mu kurinda igihugu cyenda guterwa n'ingabo z'abagizi ba nabi b’abanyamahanga.

- The Delta Force

Muri 1986, Chuck Norris yakinnye mu yitwa "The Delta Force" yitwa Major Scott McCoy. Muri uyu mukino, agaragara nk'umuyobozi w'umutwe udasanzwe w'abasirikare b'indashyikirwa barwanya iterabwoba.

Bohererezwa ubutumwa bukomeye byo gutabara abantu bari bafashwe bugwate mu kigo cy'indege yari yashimuswe n'abagizi ba nabi. Iyi filime yamenyekanye cyane kubera uburyo yerekana ikoranabuhanga rya gisirikare n'ubutwari bw'ingabo mu bihe by’amage.

- The Expendables 2
Mu 2012, Chuck Norris yagaragaye mu yitwa "The Expendables 2" akina nka Booker, uzwi ku kabyiniriro ka "The Lone Wolf". Uyu mwanya yakinnyemo wari ushingiye ku kumushimira nk'icyamamare mu mateka ya sinema aho yakinnye nk'umucanshuro w'indashyikirwa ufite ibigwi bidasanzwe.

Muri uyu mukino, hagarurwamo imvugo n'inkuru zizwi cyane ku rubuga rwe Chuck Norris Facts, zerekeye ubutwari bwe budasanzwe. Zerekana ko ari umuntu ushobora gukora ibidashoboka.

Chuck Norris Facts yamamaye guhera muri 2005. Ni inkuru zivuga ku mbaraga n'ubutwari budasanzwe by’uyu mukinnyi mu buryo burenze ukwemera kw’abantu.