Kugira camera zicunga umutekano wo mu rugo biba ari byiza, kuko bigufasha kumenya uko ibintu byifashe mu rugo mu gihe udahari, niba abana bameze neza, cyangwa niba hari ikindi kibazo.

Akenshi usanga gushyira sisitemu ya camera mu rugo bihenze, bityo benshi bakabireka.

Icyakora ni ba ufite telefoni igezweho (smartphone) utagikoresha, reka nkwereke uko wayihinduramo camera icunga umutekano wo mu rugo bitagusabye kugura ikindi gikoresho na kimwe.

Kugira ngo bikunde ukeneye ibintu bine, telefoni ya igezweho utagikoresha, telefoni ukoresha, internet, hamwe na ‘application ya Alfred Home Security camera.

Iyo ‘application’ wayikura kuri ‘App Store’ maze ugashyiramo ‘email’ yawe muri telefoni zombi, ukemeza telefoni ishaje nka camera n’iyo ukoresha ugenzura ibiba.

Hari n’izindi ‘application’ zitandukanye za home security camera nka AirDroid Personal, Pro-Vue, na Wyze. Wowe wakwihitiramo ikunyuze.

Iyo ufunguye camera kuri telefoni ishaje, ubona amashusho iri gufata muri telefoni ukoresha. Uba ushobora no kohereza ijwi ryawe cyangwa impuruza kuri telefoni ishaje cyangwa se ukemeza ko izajya ikuburira mu gihe ibonye ikintu kinyeganyeze igakeka ko hari umuntu winjiye iwawe.

Biba byiza kurushaho iyo uyicometse kuri ‘chargeur’ kugira ngo itaza gushiramo umuriro ikazima.

Ushobora no gukoresha telefoni zirenze imwe nka camera maze ukazishyira mu bice bitandukanye by’inzu yawe, ukazajya ureba ibibera mu rugo rwawe wibereye ku kazi cyangwa ahandi hantu.