Ku Cyumweru, tariki ya 26 Mata 2026, ni bwo iyi mikino yakomeje hakinwa 12 y’umunsi wa kane w’amatsinda, yabereye muri BK Arena na Petit Stade.

Nyuma y’imikino ine imaze gukinwa, amwe mu makipe akomeye yamaze kubona itike ya 1/8, mu gihe hari agihataniye gusoza ayoboye amatsinda n’andi arwana no kudasezererwa atarenze umutaru.

Kugeza ubu amakipe ane arimo APR VC na Police VC zo mu Rwanda, Al Ahly SC yo mu Misiri na Port Autonome De Douala yo muri Cameroun ni yo ayoboye amatsinda yayo uko akurikirana, aho afite amanota 12 mu mikino ane amaze gukina. APR yo ifite amanota 11 kuko yatsinze umukino ku maseti 3-2.

Ubudahangarwa bwayo muri iri rushanwa riri gukinwa ku nshuro ya 47, yabushimangiye kuri uyu munsi nyuma yo kwitwara neza mu mikino ibanziriza iy’umunsi wa nyuma [uwa 5] w’iy’amatsinda.

Mu mikino yayo yabereye muri BK Arena, Police VC yatsinze Ghana Army amaseti 3-0 (25-20, 25-20, 25-23), Al Ahly SC itsinda Kepler VC amaseti 3-0 (15-25, 19-25, 20-25) mu gihe APR VC yifashishije iseti ya kamarampaka yatsinze Nigeria Customs amaseti 3-2 (21-25, 25-21, 25-21, 24-26, 9-15).

Mu wundi mukino wabereye muri Petit Stade, Port Autonome de Douala yatsinze Kalibi SC amaseti 3-0 (25-13, 25-15, 25-14).

Aya makipe arasubira mu kibuga kuri uyu wa Mbere akina umukino wa gatanu, usoza iy’amatsinda, mu gushimangira umwanya wayo wa mbere.

Reba uko imikino yabereye muri BK Arena yarangiye:

-# AS INJS 2-3 SPORT-S VC (29-27, 25-18, 18-25, 19-25, 16-18)
-# Petrojet SC 3-0 Litto Team (25-12, 25-17, 26-24)
-# Police VC 3-0 Ghana Army (25-20, 25-20, 25-23)
-# Kepler VC 0-3 Al Ahly (15-25, 19-25, 20-25)
-# REG VC 3-0 Atlético Clube Do Mindelo (25-14, 25-19, 25-13)
-# Nigeria Customs 2-3 APR VC (21-25, 25-21, 25-21, 24-26, 9-15)

Uko amakipe yakiniye muri Petit Stade yatsindanye:

-# Rukinzo VC 0-3 General Service (20-25, 14-25, 22-25)
-# Cameroun Sports Volleyball 1-3 Equity Bank (20-25, 22-25, 25-20, 22-25)
-# Port Autonome de Douala 3-0 Kalibi SC (25-13, 25-15, 25-14)
-# Faith Union Sport 3-0 Wolaitta Volleyball (25-22, 25-12, 25-23)
-# Prisons VC 0-3 Kenya Ports Authority (15-25, 23-25, 17-25)
-# Nemo Stars 3-0 Black Rhinos (25-23, 25-19, 25-14)

Amakipe 24 yitabiriye CAVB Men’s Club Championship 2026, agabanyije mu matsinda ane, aho buri ryose ririmo amakipe atandatu. Amakipe ane ya mbere muri buri tsinda, ni yo azakatisha itike ya 1/8.