Iyi mikino yabereye muri Petit Stade i Remera ku wa Gatandatu, tariki ya 4 Mata 2026, aho amakipe yatsinze imikino ibanza yashakaga gushimangira intsinzi naho ayatsinzwe ashaka kwigarurira icyizere.

Guhera Saa 12:30, Ikipe ya Police yakinnye n’iya RRA mu guhatanira umwanya wa gatatu mu bagore, umukino urangira ikipe y’abashinzwe umutekano itsinze amaseti 3-2 (25-16, 21-25, 25-18, 24-26, 15-13).

Yabaye intsinzi ya kabiri kuri Police WVC mu ruhererekane rw’imikino itanu, ndetse bivuze ko niramuka itsinze umukino wa gatatu izahita yegukana umwanya wa gatatu.

Ni ubwa mbere RRA yatsinze iseti kuva imikino ya kamarampaka yatangira, aho yatsinzwe na APR WVC imikino 3-0 muri ½.

Nyuma y'uyu mukino hakurikiyeho uwahuje Kepler VC na Gisagara VC mu guhatanira umwanya wa gatatu mu bagabo, Kepler VC yongera kwitwara neza itsinda amaseti 3-0 (25-23, 25-17, 25-19) ndetse iyobora n'intsinzi 2-0.

Umukino wabaye uw’umunsi kubera ihangana ridasanzwe ryarimo ni uwo guhatanira igikombe mu bagore wahuje APR WVC na Kepler WVC, aho byabaye ngombwa ko hakinwa amaseti atanu.

APR WVC yatsinze Kepler amaseti 3-2 (25-21, 23-25, 23-25, 26-24, 15-13), igeza intsinzi 2-0, aho kuri ubu ibura gutsinda umukino umwe gusa igahita yegukana igikombe cya Shampiyona y'uyu mwaka cyari gifitwe na Police WVC itarabashije kugera ku mukino wa nyuma.

Mu bagabo, naho umukino wahuje Police VC na REG VC wagaragayemo guhangana kudasanzwe kuko byasabye ko hiyambazwa iseti ya kamarampaka nyuma y'uko Police itwaye iseti ya mbere ku manota 25-13, REG igaca inyuma igatwara amaseti abiri yakurikiyeho ku manota 25-23 na 25-22, mbere y'uko Police VC itwara iseti ya kane ku manota 25-23.

Mu iseti ya kamarampaka nabwo amakipe yombi yakomeje kugendana kugeza ubwo Police VC iyitwaye ku manota 23-21, isigara isabwa intsinzi umwe gusa mu mikino itatu isigaye kugira ngo izegukane Igikombe cya Shampiyona ku nshuro yayo ya mbere.

Imikino ya kamarampaka za Shampiyona ya Volleyball izasubukurwa tariki ya 17 Mata 2026 hakinwa imikino ibiri mu cyiciro cy'abagabo; uwo guhatanira umwanya wa gatatu n'uwo guhatanira igikombe. Ni mu gihe mu cyiciro cy'abagore, amakipe azasubira mu kibuga tariki 3 Gicurasi hakinwa umukino w’umwanya wa gatatu n’uwo guhatanira igikombe.