Bivugwa ko ibigo bitandukanye biri gukorana na za guverinoma z’ibyo bihugu mu kugabanya imisoro kuri telefone.

Ni gahunda yatangijwe n’Umuryango udaharanira inyungu wa Global System for Mobile Communications Association (GSMA) n’ibigo by’itumanaho bikorera muri Afurika.

Ibigo by’itumanaho bikorera muri Afurika biri gutegura uko byagabanya ibiciro kuri telefone zigezweho igiciro kikagera kuri 40$ muri gahunda yo guteza imbere umugabane wa Afurika mu gutunga telefone zigezweho.

Ibyo byatangajwe mu Nama Mpuzamahanga yiga ku ikoranabuhanga rya telefone ngendanwa n’ibijyanye naryo, Mobile World Congress (MWC), yabereye mu Mujyi wa Barcelona muri Espagne.

Ibigo by’itumanaho birimo Airtel, Axian Telecom, Ethio Telecom, Orange, Vodacom Group na MTN Group, bitanga serivise nibura ku bantu barenga miliyoni 800 b’Abanyafurika, bizagira uruhare muri iyo gahunda.

Umuyobozi Uhagarariye Afurika muri GSMA, Angela Wamola, yatangaje ko imwe mu mbogamizi ikomeye Afurika ihura nayo ari ukugera kuri telefone zigezweho.

Ati “Imwe mu mbogamizi ikomeye Afurika ihura nayo ni ukubona ibikoresho. Ibi bigaragaza ubushake bw’abaturage bacu bashaka gukoresha internet, kubera ko badashobora kubona ibyo bifuza mu ndimi zabo. Kuri twe imbogamizi ishingiye ku kugabanya icyuho binyuze mu kuzana telefone zigezweho ariko zihendutse zifite umwihariko ko zakira internet ya 4G.”

Imibare igaragaza ko nibura 85% by’Abanyafurika batuye ahantu hagerwa na internet nubwo bake cyane ari bo bayikoresha.

Hagaragajwe ko icyo cyuho giterwa ahanini n’ikiguzi cya telefone zigezweho kiri hejuru, bigatuma ingo nyinshi zigorwa no kuzitunga.

Muri iyi gahunda ibihugu bitandatu birimo n’u Rwanda ni byo bigiye gukorerwamo igerageza, ari byo u Rwanda, RDC, Ethiopia, Nigeria, Tanzania na Uganda.

Ibiganiro by’ibanze n’ibigo bishobora kugeza telefone muri ibyo bihugu byerekanye ko nibura amake ashoboka telefone yagura ari amadolari 40$ ni ukuvuga 58.183 Frw.

Wamola yerekanye ko hari n’ibindi bihugu bya Afurika byerekanye ubushake bwo kwinjira muri iyo gahunda ubwo bari mu imurikabikorwa i Barcelona.

Yatangaje kandi ko hamaze gutangwa komande, bikaba byitezwe ko zizagera mu bihugu bigiye gukorerwamo vuba. Ikindi yerekanye ni uko telefone zizajya muri ibyo bihugu zose zigomba kuba ari zimwe zinafite ubushobozi bumwe.

Abanyafurika benshi batunze telefone zigezweho ziganjemo izakorewe mu Bushinwa kuko usanga ari bwo bukora telefone zihendutse zijyanye n’ubushobozi.

Ubushakashatsi buheruka bwakozwe na GSMA bwerekanye ko mu 2024 Umunyafurika umwe muri bane yari afite telefone igezweho.

Mu Rwanda gahunda nk’iyi yakozweho n’ibigo by’itumanaho birimo Airtel yashyize ku isoko telefone yaguraga ibihumbi 20 Frw kandi ifite ubushobozi bwo kwakira internet ya 4G ndetse na MTN Rwanda nayo yabikozeho.