{Amajwi yavuye mu matora ya kamarampaka yabaye tariki 18 Nzeri muri Ecosse yagaragaje ko Ecosse itakiyomoye ku Bwami bw’u Bwongereza (UK) nyuma y’uko benshi batoye ‘OYA’.}

Mu turere 31 kuri 32 twari tumaze kubarurwa mu gitondo cyo kuwa Gatanu, 55.42% batoye ‘OYA’ naho 44.58% bashakaga ko Ecosse yiyomora ku butegetsi bw’i Londres nyuma y’imyaka 300 ibi bihugu biyoborwa n’Umwami umwe.

Umunyamakuru wa Al Jazeera uri mu mujyi wa Edinburgh yagize ati “Aho bishyira haragaragara. Ahenshi batoye OYA.”

Abaturage ba Ecosse/Scotland barenga miliyoni 4 bari biyandikishije gutora mu baturage basaga miliyoni 5 n’igice batuye iki gihugu. Ku nshuro ya mbere abafite imyaka 16 na 17 bari bemerewe gutora.

Minisitiri w’intebe wa Ecosse, Alex Salmond wari usshyigikiye ko iki gihugu kiyomora ku Bwami bw’u Bwongereza, yemeye ibyavuye mu matora.

Byari biteganyijwe ko tariki 24 Werurwe 2016 ari bwo hari gutangazwa ubwigenge bwa Ecosse iyo abashyigikiye kwiyomora ku Bwami bw’u Bwongereza baramuka batsinze aya matora ya kamarampaka.

Ubwami bw’u Bwongereza (United Kingdom/Royaume Uni) busanzwe bugizwe n’ibihugu bine ari byo u Bwongereza (England), Ecosse/Scotland, Pays de Galles/Walles na Irland y’Amajyaruguru.